Letter to God: Lord, this life ehn, it be turn by turn

Dear Father:

You see, this life ehn, they say that turn by turn. Today, you may be on the good side of life, tomorrow, it will be another person turn. So, make you treat another person well when it dey for your turn.

Hmm, my son, da whatin be this one again, you dey feel talk in parable?

Father, um, you no hear say, dey people weh dey for our Traditional Council, dey don conspired finished against de Paramount Chief. Dey don take vote remove him. Dey Paramount Chief say, he no geh problem for them to remove him, bor they moh do dey correct thing. Them say no.

In fact, they no come to de pallor weh dey don make law for our village to remove him. Them dey do it in another place.

You see ehn, Father, make I feel tell you one thing-our people say for our village da wen you point your finger, dey other four don come back to you.

Ley people don celebrate. Then dey jubilate. Bor one thin, them no feel understand is life da turn by turn. To day it be de Paramount Chief.

My son da whatin dey Paramount Chief don do for your village da make de other Chiefs dey remove fhan?

Father, they say, de Paramount Chief don play ball. He dey bring him pekin them from all over de place weh they don come occupy de Traditional Council. Then say he dey geh him own separate departments he don create for loyalty. Father dey feel talk plenty thin oo.

Bor you see ehn, de thin weh dey don tell for our village people is da, they don wan to be audited. De Paramount Chief say make we audit you people to see whatin you don do with de village money-they don say no.

So, na whatin dey Paramount Chief will do na?

Father, I heard say de Paramount Chief don run to our village Palaver Hut. He don tell dey Elders for our village whatin dey don happen for our Traditional Council.

You joking!

Lala, Father, this one na be joking matter oo. Na, na as we dey talk so, eh, one Traditional Council dey geh two Paramount Chiefs for our village-we dey inside.

So, whatin dey father for your village don talk inside this matter?

Aah, hmm, they say de Papay hand don dey inside proper. They say him pekin them and de Kountry Giant then they work together on this project.They say everybody don fear de Paramount Chief for 2029. 

You say whatin?

Father da true I dey talk so. They say de Paramount Chief dey build himself for 2029. He feel gather all dey people from different, different party for him office.

And my brabee say da wah making everybody dey scare for him. So they don say make we break him wings before he come finish us in 2029.

So, you mean all this noise is because of 2029?

Father, da de thin I don talk finish. All de noise at de Traditional Council is becos of 2029-period!