Dear Father,
Hmm, our Gina na go oo. He na carry him soft voice with him. Da humble soul da na get time for people thin, he na go. He carry him powerful ink too.
Aye mehn!
Yes, oo Father, Gina gone oo. He na leave the Town Crier Community behind. Him job over here na. Bor de shoe him lee behind we na know who foot will fit inside.
Hmm, my son it na easy. You know de pepo kill da man long time?
Oh, you mean wen de sugar make de doctor pepo to cut him foot in Charlie Land?
No, my son, I mean de pepo in Jorweah goworment.
Mm, Father dis one big for me oo. My mot too heavy for da one oo.
[bsa_pro_ad_space id=1]
Yes, my son. First de pepo try to kill him paper. They take all him pepo from him. No bisnay. To pay him debt sef da war. Then de sugar come to fini de job and everybody put it on sugar.
Aah, na I understand what you are talking. It leh de thin I can always tell de children dem da leh to play on de car road. I say wen yor pepo na killed you in de night den you come on de road in de morning for one innocent driver to fini you.
Da true Father. Da paper wor everything to de man, da wor him life. Bor de pepo take it from him so de sugar jus came to fini him. Hmm, Father da de life we living so oo.
De orther day I go to him house de bird dem wor jus singing in him yard and de tree dem were clapping their hands. I said in my heart ay ya dis good soul na go. Loka de bird and de tree dem how dey sending him home in peace.
Yes, oo my son, he na go in peace to rest. At least him own fini. Him na lee it with yor.
Yes, oo Father.
Anyway they say wa going on in yor village there, I heard everybody running to de Taxi Driver Camp ehn?
Hmm, Father da wa we hearing oo. They say all de Old Lady children dem na jumped behind him oo. Poor Old Lady her owner name can’t fini in de pepo mot. Sometimes I can be wondering if she can hear somer de thing dem pepo can be saying abot her.
Bor dey say da na small skeleton dem de pepo hurling from de closet oo.
Tell me something my son!
Yes, oo Father. De orther day somebody wor digging my friend owner story out. Dey say him wor with de Ray Hay man pepo dem da beat da poor human right lawyer who say he wan be president.
Yes, oo, de pepo play de poor lawyer confess story on tape.
Hayak, my son, ay look leh 2023 will na be easy oo. Da na small fire work will burn in yor village ooh.
Father, dey mot jus take time before dey and can town crier dem burn it for us oo. Becux it will na be easy, it will na be yorleh.
Hmm, we inside. Everybody inside de fight for him life. Bor at de end our village will be de only winner.
