Letter to God: Lord, when will this train really pick up na?

Dear Father:

Hmmm, this one train can’t pick up na, we will soon be reaching mile 90 oo. Somer us na know what to tell our people dem when we reach oo.

Bor my son oo, how de train will pick up when everyday they putting people there and putting them down?

Aah, bor Father you want tell me all de time they wor having you mean they na check the passenger them document before putting them on de train here. I hope da na style they playing here.

What do you mean, my son?

Ehn you know they say when de train pick up, de first 90 mile, we will na see no jalopy sticking in de mud along our village road? And for all we know, we na reached mile 25, still no sign of de train even starting before I say picking up.

Um, they say somer de passenger them still in Uncle Sam Village. They say since they called their name them to come join dis train here de first ray carpa to buy their plane ticket to come, it na there.

You joking!

Aah, da fire coming from my mouth. They say somer de people wor hauling it over there, you think to geh plane ticket money to come from Uncle Sam Village to our highly forested village da small money?

Bor my son oo, why if de people them wor doing something before de Old Man go put their name them down to geh on de train?

Father, I beg you ya. You wan tell me whole three months since de Old Man win our village voting he na know who he wor going to put on him train?

Um mmm.

Yes na Father, all de noise de man them wor making, you wan tell me they na know where they were standing with de Old Man?

My son, bor how long to come from Uncle Sam Village?

Fahter, it na how long oo, de first thing whether somer de conned man them geh ticket money to come first.

What do you mean?

Oh, You na hear de book people say “all da glitters, a na gold”? Every day we hear say my son in Uncle Sam Village, my son in Uncle Sam Village you know whatin him doing there?

 Look, leh me tell you, somer them na geh no job there da wah you see when de Goworment in power na their goworment, they can be sitting over their talking big, big thing them.

You mean da to come and geh job bisnay?

Father, you yourself too ya, you think whatin de people can be making all the plenty noise them for- ehn da to geh job. You think wah da orlor Reverend wor here for, ehn da job. He na geh de job na, ehn he na geh vex and gone back to him family people in Uncle Sam Village.

Father, all de noise them you can hear da na love for village bisnay oo, de thing da job bisnay. The people can’t survive without goworment job-period!

So, wah kana style you say de people wan play na?

Oh, yea, you know when de train na delay and we reach mile 90, they will say da because de train na pick up soon, da wah we see all de jalopy them in de mud, bor da lie, we jus watching them. they will balance.