Letter to God: Lord, The Papay mom play dirty way again!

Dear Father:

Have you heard the news? They say, the Papay say election bisnay na fini so nobody mom run around here with their partisan noise becus him goworment will na be partisan goworment.

You joking!

Oh, you wan come see some partisan them hissing their teeth them again. The Papay fini giving them direct code. He say na becus you wore party t-shirt and made plenty noise all over the place bisnay they mom come give you job.

You say whatin?

Oh, Father, da na joking matter oo. Right na they say fire in the camp. They say the Papay say he will go by our village code of conduct. If you party big man you mom remain party big man.

Right, na, na, all the people name the Papay na called, na from inside the Party oo. Hayaka, the people na know that this Oldman geh dirt.

Already, they say him people na start causing noise all over the place. They say, it worn a easy at him house the orlor day.

Tell me something!

Oh, they say somebody go put some kina name on paper for Goworment lawyer, the Papay say he na want see it they mom take it from there fast, fast.

They say somer the people sef da wor round the Oldman who wor doing small, small stealing bisnay-chopping the money people wor sending to him for campaign, he fini chunking them one side.

Hmm, yes oo, they say da na small vex him people vex oo. They say somer the people we know sef will na geh anything. They say the Papay say they mom stay in the paprty and run it from there.

I say my son, then da na small thing oo.

Oh Father, da the one you talking slow like that so. The thin da made the people almost throw blow in the Papay yard the other day, da it you talking leh da.

Bor wah they complaining for na, ehn d orlor man say him geh plenty scholarship for the people. So, if the Papay na give them job they can jus go to him and go to school.

Mm, aya, da that jabber man the people will listen to, I beg you ya. Da orlor man d pure show man. He leh glory.

Anyway, da one thing I forgot to ask you my son- The Papay na finish him speech?

Father, da the thin we all sitting down here talking right, right na. Everybody asking the same question about wen he will fini him speech. Bor the play him eh na, I na think him on speech bisnay again oo.

What do you mean?

Bor da speech bisnay na it fini ever since Fahrter. Da so, so job bisnay the people on na oo.

You say whatin! And I here sitting down waiting for the Papay to fini him speech. Oh mehn, and I hear listening to Kissi choir thinking say I sitting down to some kina musical concert.

I say, bor who tell them say inauguration da musical concert bisnay?

Father, da orlor question for Aunty MF ooh, da she the one put all this yamayama together oo,

The whole program sef wor embarrassing-aye mehn.